ខេត្តកណ្ដាល៖កាលពីរសៀលថ្ងៃទី២៨ ខែវិច្ឆិកា ឆ្នាំ២០២១ម្សិលមិញនេះរដ្ឋបាលស្រុកល្វាឯម បានរៀបចំពិធីប្រណាំងទូកប្រណាំងទូកជ្រើសរើសជើងឯក ទូកខ្នាតខ្លី និងខ្នាតវែង នៅមាត់ទន្លេមេគង្គ ទល់មុខអធិការដ្ឋាននគរបាលស្រុកល្វាឯម ស្ថិតក្នុងភូមិវាលធំ ឃុំពាមឧកញ៉ាអុង ដើម្បីអបអរសាទរខួប ៣ឆ្នាំនៃការដាក់បញ្ចូលល្ខោនខោលវត្តស្វាយអណ្ដែត របស់ស្រុកល្វាឯម ទៅក្នុងបញ្ជីរបេតិកភណ្ឌវប្បធម៌អរូបិយនៃមនុស្សជាតិ របស់អង្គការយូណេស្កូ(២៨ ខែវិច្ឆិកា ឆ្នាំ២០១៨-២៨ ខែវិច្ឆិកា ឆ្នាំ២០២១) ផងដែរ។

លោក កន សុខកាយ អភិបាលស្រុកល្វាឯម បានថ្លែងថា ការរៀបចំពិធីនេះក្នុងគោលបំណងបង្កលក្ខណៈសប្បាយរីករាយជូនប្រជាពលរដ្ឋ រក្សានូវប្រពៃណីទំនៀមទម្លាប់ពីដូនតា និងពង្រឹងនូវស្មារតីសាមគ្គីភាពគ្នា ស្របពេលដែលរាជរដ្ឋាភិបាលបានសម្រេចបើកប្រទេស ឱ្យមានការជួបជុំឡើងវិញកាលពីថ្ងៃទី១ ខែវិច្ឆិកា ខណៈដែលការឆ្លងរីករាលដាលនៃជំងឺកូវីដ-១៩ ក៏មានភាពធូរស្រាលច្រើន និងដោយសារមានការចូលរួមគាំទ្រពីព្រះគ្រូចៅអធិការតាមបណ្ដាវត្ត រួមនឹងសប្បុរសជនជាច្រើនរូប ដើម្បីចូលរួមអបអរសាទរព្រះរាជពិធីបុណ្យអុំទូក អកអំបុក សំពះព្រះខែ ពិសេសគឺដើម្បីចូលរួមអបអរសាទរខួប ៣ឆ្នាំនៃការដាក់បញ្ចូលល្ខោនខោលវត្តស្វាយអណ្ដែត របស់ស្រុកល្វាឯម ទៅក្នុងបញ្ជីរបេតិកភណ្ឌវប្បធម៌អរូបិយនៃមនុស្សជាតិ ផងដែរ។

នាឱកាសនោះដែរ លោកអភិបាលស្រុកល្វាឯម ក៏បានឆ្លៀតអប់រំ និងផ្សព្វផ្សាយឱ្យប្រជាពលរដ្ឋត្រូវបន្តចូលរួមទប់ស្កាត់ការឆ្លងជំងឺកូវីដ-១៩ អនុវត្តនូវវិធានអនាម័យ ឱ្យបានល្អប្រសើរ ត្រូវមានការប្រយ័ត្នប្រយែងខ្ពស់ ជាពិសេសត្រូវពាក់ម៉ាសឱ្យបានគ្រប់គ្នា បើទោះបីជាប្រជាពលរដ្ឋដែលអញ្ជើញមកទស្សនាបានឆ្លងកាត់កាវាស់កំដៅ ការបាញ់អាកុលនិងការអនុវត្តយ៉ាងខ្ជាប់ខ្ជួននូវវិធានសុខាភិបាលដ៏ដោយ៕