ក្រុមក្មេងទំនើង ១១នាក់ ក្នុងចំណោម ១៦នាក់ ប្រដាប់ដោយកាំបិត ដាវ ដេញកាប់គូ សត្រូវ បង្កការផ្អើលពេញសង្កាត់អូរអំបិល ត្រូវបានកម្លាំងអធិការនគរបាលក្រុងសិរីសោភ័ណ ចុះប្រតិបត្តិការបង្ក្រាប រួចបញ្ជូនទៅតុលាការខេត្តបន្ទាយមានជ័យ
ខេត្តបន្ទាយមានជ័យ៖មិនទុកយូទេ ក្រោយពីទទួលបានព័ត៌មាន ករណីក្រុមក្មេងស្ទាវប្រដាប់ដោយកាំបិត ដាវ ដេញកាប់គ្នាដូចហ្វូងគោ នៅចំណុចតូបលក់ឥវ៉ាន់ចាបហ៊ួយ១កន្លែង ស្ថិតក្នុងភូមិអូរអំបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ កាលពីវេលាម៉ោង ៨យប់ ថ្ងៃទី២៣ ខែឧសភា ២០២៣នោះ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានបញ្ជាឲ្យលោក វរសេនីយ៍ឯក ស៊ី ឌី អធិការនគរបាលក្រុងសិរីសោភ័ណដឹកនាំកម្លាំងនគរបាល សហការគ្នាជាមួយកម្លាំងនគរបាលព្រហ្មទ័ណ្ឌកំរិតស្រាល ចុះធ្វើការស្រាវជ្រាវរហូត ឈានដល់ឃាត់ខ្លួន ជនសង្ស័យបានចំនួន១១នាក់ ក្នុងចំណោម ១៦នាក់ រួមនិងវត្ថុតាង មានម៉ូតូ៥គ្រឿង និង កាំបិតពិឃាត ៣ដើម យកទៅអធិការក្រុងសិរីសោភ័យ ដើម្បីធ្វើកំណត់ហតុ ។
តាមការអះអាងរបស់ជនសង្ស័យទាំងអស់បាននិយាយប្រាប់សមត្ថកិច្ចថា រឿងរាវដែលឈានដល់កាប់គ្នានេះ គឺផ្តើមចេញពីរឿងគំនុំកន្លងមក ដោយក្រុមខ្លួនមិនសុខចិត្ត ប្រមូលគ្នាបានចំនួន ១៦នាក់ជិះម៉ូតូ៦គ្រឿងចេញធ្វើសកម្មភាព ទាំងយប់ មានម៉ាកហុងដាឌ្រីម៥គ្រឿង ម៉ាកស្កុបពីរ ១គ្រឿង ពណ៌ខៀវ ដេញកាប់ និងយកដុំថ្មគប់ទៅលើ ជនរងគ្រោះមានគ្នា ៥នាក់ នៅចំណុច បណ្តាលឲ្យជនរងគ្រោះម្នាក់រងរបួសធ្ងន់ដឹកបញ្ជូនទៅព្យាបាលនៅមន្ទីរពេទ្យមិត្ដភាពកម្ពុជាជប៉ុនស្រុកមង្គលបូរី ចំណែក ៤នាក់ទៀតគេចរួចខ្លួន មិនអស់ចិត្ត ជនសង្ស័យបានកាប់ម៉ូតូ ខូតអស់៣គ្រឿង បន្តទៀតហើយគេចខ្លួនបាត់អស់។
លោកវរសេនីយ៍ឯក ស៊ី ឌី បានឲ្យដឹងថា ជនសង្ស័ទាំង១១នាក់ រួមមាន៖
ទី១) ឈ្មោះឡន ជីឡុង អាយុ១៦ឆ្នាំ,ទី២) ឈ្មោះសម្ភស្ស ប៊ុនហេង អាយុ១៦ឆ្នាំ,ទី៣) ឈ្មោះ ញែប ឡុងហេង អាយុ១៧ឆ្នាំ (ជនដៃដល់មានកាំបិត) ,ទី៤) ឈ្មោះ ពេញ នរៈសត្យា អាយុ១៧ឆ្នាំ, ទី៥) ឈ្មោះ ខន រតនា អាយុ១៦ឆ្នាំ,ទី៦) ឈ្មោះ ខន សិរីឧត្តម អាយុ ១៦ឆ្នាំ ,ទី៧) ឈ្មោះ យាន គារ៉ា អាយុ១៦ឆ្នាំ, ទី៨) ឈ្មោះ ធឿន ប៉ូលីន អាយុ១៧ឆ្នាំ, ទី៩) ឈ្មោះ ប៊ុឡា ផានិត អាយុ១៥ឆ្នាំ ភូមិសូភី ,ទី១០) ឈ្មោះ ជូ បញ្ចះបញ្ញា អាយុ ១៦ឆ្នាំ, ទី១១) ឈ្មោះ ភាព ពីនធុក អាយុ១៥ ឆ្នាំ ជនសង្ស័យទាំង១១នាក់ រស់នៅក្នុងក្រុងសិរីសោភ័ណ។ចំណែកជនរងគ្រោះមានឈ្មោះ សមុទ្យ ភេទប្រុស ត្រូវគេកាប់ចំដៃឆ្វេង ។
លោក អធិការ បានបញ្ជាក់ថា នៅព្រឹកថ្ងៃទី២៥ ខែឧសភា ឆ្នាំ២០២៣នេះ លោកបានបញ្ជូនជនសង្ស័យនិងវត្ថុតាងទៅស្នងការខេត្ត ដើម្បីចាត់ការបន្ត។ ដោយបានការអនុញ្ញាតពីលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ និងមានការសម្របសម្រួលពីលោក កើត វណ្ណារ៉េត ព្រះរាជអាជ្ញា អមសាលាដំបូងខេត្តផងនោះ ជនសង្ស័យ ត្រូវបានកម្លាំងការិយាល័យព្រហ្មទណ្ឌខេត្ត បន្តបញ្ជូនទៅសាលាដំបូងខេត្ត ដើម្បីចាត់ការទៅតាមច្បាប់ ចំណែក ជនសង្ស័យ៥នាក់ទៀតកំពុងរត់គេចនោះកម្លាំងនគរបាលក្រុងសិរីសោភ័ណ កំពុងស្រាវជ្រាវយកមកផ្តន្ទាទោសទៅតាមច្បាប់ផងដែរ៕
