អាជ្ញាធរខេត្តបន្ទាយមានជ័យ ប្រកាសបើកយុទ្ធនាការចាក់វ៉ាក់សាំងបង្ការជំងឺកូវីដ១៩ ជូនដល់កុមារចាប់ពីអាយុ៦ឆ្នាំ ដល់ក្រោម១២ឆ្នាំ នៅក្នុងភូមិសាស្ត្រខេត្តបន្ទាយមានជ័យ
.jpg)
ខេត្តបន្ទាយមានជ័យ៖ស្រុក ក្រុង ចំនួន៩ នៅក្នុងភូមិសាស្ត្រខេត្តបន្ទាយមានជ័យនៅថ្ងៃទី១៨ ខែកញ្ញា ឆ្នាំ២០២១ ចាប់ផ្តើមបើកយុទ្ធនាការចាក់វ៉ាក់សាំងការពារជំងឺកូវីដ.១៩ ជូនដល់កុមារចាប់ពី អាយុ៦ឆ្នាំ ដល់ក្រោម១២ឆ្នាំ នៅតាមមណ្ឌសុខភាពជិតមូលដ្ឋានរស់នៅរបស់ខ្លួន។
តាមសេចក្តីជូនដំណឹងរបស់រដ្ឋបាលខេត្តបន្ទាយមានជ័យលេខ ៤៧៩/២១ សជណ ចុះថ្ងៃទី១៦ ខែកញ្ញា ឆ្នាំ២០២១ បានជំរាបជូនដល់សាធារណជន និងមាតាបិតា ឬអាណាព្យាបាលទាំងអស់ ជ្រាបថា មន្ទីរសុខាភិបាលនៃរដ្ឋបាលខេត្តបន្ទាយមានជ័យ នឹងបើកយុទ្ធនាការចាក់វ៉ាក់សាំងការពារជំងឺកូវីដ.១៩ ដល់កុមារចាប់ពីអាយុ ៦ឆ្នាំ ដល់អាយុក្រោម១២ឆ្នាំ នៅតាមមណ្ឌលសុខភាពក្នុងមូលដ្ឋាន ឃុំ/សង្កាត់ ដែលខ្លួនរស់នៅ និងរៀងរាល់ថ្ងៃចន្ទ ដល់ថ្ងៃអាទិត្យ ដោយពេលព្រឹកចាប់ពីវេលាម៉ោង៧និង៣០នាទី ដល់ម៉ោង១១និង៣០នាទី ,ពេលរសៀលចាប់ពីវេលាម៉ោង១៣ និង០០នាទី ដល់ម៉ោង១៦និង០០នាទីល្ងាច ដោយភ្ជាប់ជាមួយឯកសារដែលត្រូវយកមកជាមួយសម្រាប់ការចាក់វ៉ាក់សាំងការពារជំងឺកូវីដ១៩ រួមមានៈសំបុត្រកំណើត ឬសៀវភៅគ្រួសារ ឬសៀវភៅស្នាក់នៅ ឬលិខិតឆ្លងដែន ឬលិខិតបញ្ជាក់ផ្សេងៗពីអាជ្ញាធរមូលដ្ឋាន។ត្រូវមានមាតា បិតាឬ អាណាព្យាបាល នាំកុមារមកទទួលចាក់វ៉ាក់សាំងការពារជំងឺកូវីដ១៩ ហើយការចាក់វ៉ាក់សាំងនេះ ដោយការស្ម័គ្រចិត្ត និងមិនមានការបង់ថវិកាឡើយ។
ជាមួយគ្នានោះដែរមាតា បិតាឬ អាណាព្យាបាល រំពឹងថា នៅពេលដែលកូនៗបានចាក់វ៉ាក់សាំងរួច ពួកគេនឹងមានសុខភាពល្អ ហើយអាចចូលរៀននៅតាមសាលារដ្ឋ និងឯកជនបាននាពេលឆាប់ៗខាងមុខនេះ។ក្នុងនោះដែរពួកគាត់បានថ្លែងអំណរអរគុណយ៉ាងជ្រោលបំផុតចំពោះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានយកចិត្តទុកដាក់ខ្ពស់ចំពោះក្មួយៗកុមារ ដែលមានអាយុចាប់ពី៦ឆ្នាំដល់ក្រោម ១២ឆ្នាំ ដោយបានដាក់ចេញយុទ្ធនាការជាតិចាក់វ៉ាក់សាំងការពារជំងឺកូវីដ១៩ ក្នុងក្របខ័ណ្ឌទូទាំងប្រទេស ដែលសម្ដេចបានខិតខំខ្នះខ្នែងស្វែងរកវ៉ាក់សាំងការពារជំងឺកូវីដ១៩ ដើម្បីការពារអាយុជីវិតប្រជាជននៅទូទាំងប្រទេស ក៏ដូចជានៅក្នុងខេត្តបន្ទាយមានជ័យ ដើម្បីជៀសផុតពីជំងឺដ៏កាចសាហាវនេះផងដែរ៕
