អាជ្ញាធរកម្ពុជា បញ្ជូនខ្លួនជនជាតិថៃប្រុស ស្រីជាង៦០នាក់ ទៅប្រទេសរបស់ខ្លួនវិញ បន្ទាប់ពីលួចឆ្លងដែនខុសច្បាប់មកធ្វើការ នៅភូមិសាស្ត្រក្រុងប៉ោយប៉ែត
ខេត្តបន្ទាយមានជ័យ៖ជនជាតិថៃប្រុសស្រីចំនួន៦៧នាក់ ដែលលួចឆ្លងដែនមកស្នាក់នៅ និងធ្វើការដោយខុសច្បាប់ នៅក្រុងប៉ោយប៉ែត ត្រូវបានសមត្ថកិច្ចកម្ពុជា ចាប់ឃាត់ខ្លួនប្រគល់ឲ្យសមត្ថកិច្ចថៃវិញ នៅថ្ងៃទី១៥ ខែវិច្ឆិកា ឆ្នាំ២០២១ នៅច្រកទ្វារអន្តរជាតិប៉ោយប៉ែត។
បើតាមប្រភពព័ត៌មានបានឲ្យដឹងថា ជនជាតិថៃទាំងអស់នេះ ត្រូវបានថៅកែអនឡាញជាជនជាតិចិនបង្ឃាំងទុកក្នុងន័យជួញដូរមនុស្សដោយខុសច្បាប់ រួមទាំងធ្វើទុកបុកម្នេញ និងលក់ពីថៅកែមួយទៅថៅកែមួយទៀត បើមិនអាចធ្វើការបានចង់ត្រឡប់ទៅប្រទេសខ្លួនវិញ តម្រូវឲ្យបង់លុយលោះខ្លួន ហើយក៏ត្រូវបានសមត្ថកិច្ចកម្ពុជាចូលរំដោះបាន។
បើតាមសមត្ថកិច្ចបានឲ្យដឹងថា ជនជាតិថៃដែលត្រូវសមត្ថកិច្ចកម្ពុជា ចាប់ឃាត់ខ្លួនបញ្ជូនទៅឲ្យខាងភាគីថៃវិញនេះមានចំនួន៦៧នាក់ ក្នុងនោះមានស្រី២៤នាក់ ដែលលួចឆ្លងដែនមកធ្វើការងារដោយខុសច្បាប់នៅក្នុងភូមិសាស្ត្រក្រុងប៉ោយប៉ែត ខេត្តបន្ទាយមានជ័យ។
សមត្ថកិច្ចបញ្ជាក់ថា ករណីខាងលើនេះ មិនមែនជាករណីចាប់បង្ខាំង និងជំរិតនោះទេ ជាទន្លាប់របស់ពួកគេ នៅពេលដែលលួចចូលមកស្នាក់នៅធ្វើការបានមួយរយៈ ចង់ទៅប្រទេសខ្លួនវិញពិបាកក្នុងការឆ្លងដែន ដូច្នេះដើម្បីបង្កលក្ខណៈងាយស្រួលទើបរកវិធីមួយប្តឹងទៅសមត្ថកិច្ច ឬក៏ស្ថានទូតឲ្យជួយអន្តរាគមន៍ចាប់បញ្ជូនពួកខ្លួនទៅមាតុប្រទេសខ្លួនវិញ ដោយមិនចាំបាច់ចំណាយប្រាក់នោះឡើយ។
គួរបញ្ជាក់ផងដែរថា រយៈកាលកន្លងមកនេះទាំងកងកម្លាំងភាគីថៃ និងកម្ពុជាចាប់ឃាត់ខ្លួនបានជាបន្តបន្ទាប់នូវករណីលួចឆ្លងដែនដោយខុសច្បាប់របស់ជនជាតិថៃ ដើម្បីមកបម្រើការងារនៅក្នុងភូមិសាស្ត្រខេត្តបន្ទាយមានជ័យ ពិសេសនៅតាមកាស៊ីណូក្រុងប៉ោយប៉ែតតែម្តង ដោយសំង្ងំជួលបន្ទប់ស្នាក់នៅ៕
